Mä seit üs Bireböim nache, dass mir ä chli heikli sige. Das mag si, aber eigentlich wüsse mir eifach, was guet isch. Töif i üs inne schlummeret nämlich ä Weisheit, wo nid jede het, ä ächte Chärn. Du seisch dere Eigenart viellicht distanziert oder gar reserviert si, für mi isch das eifach mini Wäsenstreui. Mir gloube nid aues, wo da verzeut wird uf dere Ärdchugele. Mir kenne d Absichte derhinger genau. Dir Mönsche sit Meister:inne drin, euch säuber ztüsche.
Zämesi macht glücklich
Mir si keni Einzugänger u sehr kommunikativ ungerenang. Bi üs weiss immer jede Bscheid. Das liegt a üsere guete Vernetzig.
We mir Bireböim so uf eui Vernetzige luege, de gseh mir oft äs Chrüsimüsi a zämegwürflete Mönsche, izwängt i Rouene, wo ihne gar nid entspräche. Das cha nid funktioniere. Aues, was geistriich isch, geit hiä verlore. U wenn i das ufs Gäud ummünze, de luegt ä jede für sich und sis eigete Sunnestübli. Ä jede Bireboum hiä het glich viu Sunne und glich viu Platz u das macht s Zämesi so koschtbar. Äs isch kes Zwängele, Beniide und Kämpfe u ä kes Verdränge und enang übere Tisch abschrisse. Jede het si Platz u aues, was är brucht. D Gmeinsamkeit macht üs starch. Das fixierte Dänke, macht euch uf d Duur unbeweglich und sogar unglücklich.
Mini Weisheit für di:
Erchennit dr Wärt vom Mitenang i auer Liebi und Achtig. Jede Mönsch het Qualitäte i sich inne, wo einzigartig koschtbar si. Wenn ä jede das läbt, won är i sim Wäse o isch, wird vieles glinge und usem Glinge gedeiht o s Glück im Härz und das cha niemer choufe. Eues Läbe isch wiene goudigi Waag, wo dir drüber richtet.