Mir Birkene bruche nid viu. Mir si gnüegsam, sparsam und i üs inne ruhend. Mir nä d Chraft us dr Töifi vom Chärn und usem Ruhepol vor Ärde. Mir schlö üsi Wurzle dert, wo d Ärde brach isch.
Über d Chaft vo dr Birke und em Fluss vom Läbe
Mir si auisamt sanft mitenang verbunge. Dr Übergang vom Ig zum Du isch fliessend. Jedes Läbewäse isch Teil vomne fliessende Strom – em Läbesstrom. Dört drinn chöit dir Mönsche euch i däm Mass entwickle, wiä dir euch das wünschet. Die einte heis gärn rasant u angeri nä sich gärn me Zit. Sich ztroue und sich däm azvertroue isch dr Sinn, wo eues Läbe sött begleite. Wiä hiigäbigsvouer dir das machet, umso chraftvouer wird das Ganze.
I ghöre euch geng öppe chli umemuule, wenn dir bi üs im Birkewaud verbichömet. Dir steuet euch existenzielli Frage und fluechet über angeri. Äs isch a dr Zit, das z erneuere, denn äs füehrt euch nid zur Queue vo euerer Wahrheit.
Mir Birkene si Weisheitslehrer und Weisheitslehrerinne. Mir si vouer Inspiratione für euch Mönsche. Ä Inspiration vo üs isch wiänä sanfti Berüehrig vo eurer Seu. Dür das wecke mir Bewusstsi. Mir mache eigentlich nüt angers, aus d Erinnerig i euch inne wachzrüttle, wär dir i Würklichkeit sit. Es chunnt de scho öppe vor, dass dir euch ä bitz verdüet und nech i dere grosse witte Wäut verlüüret. Äs git ou gar viu Idrück und Abdrück hiä und vieli Forme, sich vom Wäsentliche abzlänke.
Mini Weisheit für di:
Aues, was du us dr Schönheit vo dim Wäse schöpfisch, biudet ä eigeti Läbesstruktur, Fäubsetzige lösts ab. Gniess diä Erliechterig u form us dim Läbe schöni Momänte und mach goudigi Erinnerige druss.